Mûgîkûyû atirithagio ,agakinyûkithio na agatirîrwo nî magongona tondû mîciî yûraga ngo ciagîrîrwo makûmbî igûrû ona kana yegera.Namo mago(ngo)na nîmo (ngo) ya mûgîkûyû arî mûhuro wa riûa kuuma aciarwo Oro nginyagia rîrîa akoima thîîno.
Magongona gûkîrî ma mûciî,ma gîthaka ona ma Ngai nomo metagwo ma mûgumoinî.
Ûmûthî tûgûikîria magongona ma gûtûnga.
Namo matûnga mahana ta ûû;
1.Mwana nîatûngagwo nî ithe aciarwo na mbûri ya ngoi.
2.Ithe no atûngaga mwana akîmûcokia ihuinî
3.Mwana akiuma itîri kûrîa araruîre ithe nîamûtûngaga akîmûtheria ndakaingîrie thaahu mûciî.
4.Njamba cikiuma ita no nginyagia igatûngwo na ngemi na ngoima ya kwenjwo na ya ndûhiû.
5.Mûtumia kana mwana angîumagarire athiî iceera,thûgûrî ona kana kûndû kûngî no nginyagia angîatûngirwo ona mûthuri ndaingîraga gwake Oro ûguo.
6.Mûndû angîorire athiî na age aikare atarî acoka no nginyagia angîatûngirwo.
Itûnga rîa mwana aciarwo;
Mwana wa mûgîkûyû angîaciarairwo no nginyagia ithe angîathînjire aite thakame ya mbûri Oro ta ûrîa nyina araitire yake nîguo mendane na matirithanie na mwana ûcio nîkîo ciana itiamenete maithe ta ûrîa rîu maramamena tondû ûthamaki wao ndûrî waitîrwo thakame .
Mûthenya wa kana wa gatano gûkiringana nî karîki kana gatooka ithe wa mwana maikûrûkaga kîanda na ûmwe wa atumia arîa marahiûhîria mûka agatema igwa Oro inya kana ithano cia mûirû na agatema irigû rîa mûtahato kana mûthîrîrî makambata nîguo agathînje ndûrûme.
Athînja rûûa rûkamenyererwo mûno tondû nî ruo rûcokaga kuuma ngoi ya mwana na îthînjagîrwo njaa îroretio na mûromo wa nyûmba.Mwana nîwe ûgeragia mbûri îyo kuuga nîwe ûcûnithagio thakame ya mbûri yarathwo na îkîrî na njino na ndugo na ya ndugo ndîraraga îtarî ngerie.
Guoko nî kwa mûciarithania na gûtiringagio rûûî na no aheagwo njahî.Nyina wa mwana nake nîwe ûrugûragia mbûri na mbaru inya kana ithano Oro ta ûrîa mwana atariî wakaira arîa angî marîe.
Marîkia kûrîa ithe wa mwana akarathima mwana wake na akamûiyûkia thîîno na mûciî wake nîguo akûre endetwo nî igûrû rîa Ngai na thîî yake.
Ngoima îno noyo îtagwo ya hiûhio îrî ya kûhiûria mûciarî kana ya mûciarî kana ya ngoi no nîyo ya igongona rîa kûrugûrîria mwana mûtûrîre.