Nyagatûng'û.
Nîndîratonyire mbûgû îgiî nyagacû, ûrîa nî mûtumia mûgûre nî mûhîrîga wa mûrûme, na njohi, ona mbûri na runo rwa nyina no agacoka agatharia na mûndûrûme ûngî ûtarî ûtarî wa rika rîa mûrûme oûû atî hatingîkorwo na thiriti ya kûhanda itimû.
Kaûndû nîkararakire atumia mûno maroria karî oo mohetwo nî mawatho?. Mûtumia ûyû angîakomirwo nake nîkweyûragio ciûria nyingî, ta, î hihi atharia tondû mûrûme nîagoyagia naihenya mathie gîathî î kana hihi rutungu rwake nî rûrî thieya rûtiraragia mwaki? Kîrîra nî ûra thoni ndûgû ciakwa.
Mûthuri ûyû nîoragio nî rika rîake ciûria ici mbere ya mûka aneanwo kûrî gîthatûri kana kîûgû gîa itûra narî thahu ûcio ume mûciî, no tondû thiya ndîthûire mûmîoni îthûire mûmîanîrîri rî, ndarî hîndî angîaugire gîtûmi kîa mûka gûkûnywo mbakî nja!
Nahau naho nîho akagîra mûka Thome na akahikania no nîetagwo nyagatûng'û. Mûrûme wa nyagacû agetwo nyagatûng'û! Ûndû ûyû wekagwo ûrî ûrutani mûnene kûrî andû marî kîhiko-inî. Ûû atî gûtirî ûngîhithîire ûngî. Mûthuri aremwo nîkugithia ngemi gwake agetha mûndû wa rika rîake akamugithîria ngemi na kûu nîkuo gwetagwo kûhanda itimû!
Î tondû andû anja nîa anja makîrî mabata mao. Mûthuri angîamenyire atî rutungu rwake rûtirararia mwaki ethaga thiari yake naihenya akamûrarîria mwaki atanetwo nyagatûng'û.
Ûcio nîwe nyagatûng'û andû merore ithatûri cianinwo nî gatego na gîcûnûnû iria ciarehwo nî comba. Î na mwaikara ihûgo mwauga comba nîwokire gwîka wega karûri na metumi?
Njîtagwo Mûnjiru mûndû mûgo wa mîandîko na mîgambo, Mejjah wa Kamau gwitû gîcirû no thayû na tûtirîraga no anga mwana wokire na nyina,na angîûka na nyina mbûri no îmwe tûgarûrîre. Ndiokire na maitû.